Friday, July 4, 2014

වෙනසට එරෙහිව- ටයිටන් විප්ලවය 6

පළමු කොටසට
මෙතෙක් කතාව...

     මේ ඉන්දියාවේ ටයිටන් ඔරලෝසු සමාගමේ විප්ලවීය නිර්මාණයක් වූ ලොව සිහින්ම ජලප්‍රතිරෝධක ඔරලෝසුවේ කතාවයි. ස්වදේශීයත්වය අගයමින් සංවර්ධිත රටවල් කෙරෙහි වූ සෙය්‍ය මාන ආකල්පය ජයගනිමින් තම රට තුල නිපදවූ විස්මිත නිර්මාණයක කතාවයි.  
lifestyle.pricedekho.com

අභියෝගය ජය ගැනීම; ඔරෙලෝසු ආවරණය 
       
ඔරලෝසු චලිතය නිර්මාණය වූ අවසන සර්සස් දේසයි මෙම ආවරණය පිළිබඳ අභියෝගය ජය ගැනීමට ඉංජිනේරු අංශ ප්‍රධානී බී.වී නාගරාජ්හට පැවරුවේය. මිමි 1.15ක් සිහින් තමන්ගේ වැඩකරන ආකෘතිය රැගෙන නාගරාජ් හා ධ්වරකාන්ත් සුප්‍රසිද්ධ ඔරලෝසු නිශ්පාදකයන්ගේ ප්‍රදර්ශනයකට යෑමට තීරණය කළහ. ස්විට්සර්ලන්තයේ බැසෙල් හි පැත්නවුනු මේ ප්‍රදර්ශනයේදී තමන් වෙහෙස වී තැනූ ඔරලෝසු යාන්ත්‍රණය සඳහා ජල ප්‍රතිරෝධක ආවරණයක් සොයාගත හැකි වේ යැයි ඔවුහු විශ්වාස කළහ. අන් සැවොම සේම ඔවුනුත් ඔරලෝසු කප්පිත්තන් සිටින්නේ ස්විස් රටේ බව විශ්වාස කළහ. බී.වී. නාගරාජ්ගේ වචන වලින් කිවහොත් 

“ලෝකයේ ඔරලෝසු තාක්ෂණයේ ගුණාත්මකබව, නිමාව,විලාසිතාවන්, විශ්වාසනීයත්වය සියල්ල සංසන්දනය කරන්නේ ස්විස්ට්සර්ලන්තයේ ඔරලෝසු සමඟ. කවුරු හරි කීවොත් ඔබගේ නිර්මාණය ස්විස් නිර්මාණයක් තරමටම අගෙයි කියලා ඒක තමයි කෙනෙකුට ලැබෙන්න පුළුවන් ඉහලම ප්‍රසංශාව“

      ස්විස් ඔරලෝසු තාක්ෂණය ගැන මේ පැතිරගොස් තිබුනු පුහු කීර්තිය නිසා ධ්වරකාන්ත් හා නාගරාජ් තමන්ගේ ඔරලෝසු යාන්ත්‍රණයට ස්විස් වැඩකරුවන් ජල ප්‍රතිරෝධක ආවරණයක් සොයා දෙතැයි විශ්වාස කළහ. නමුත් ස්විට්සර්ලන්තයේදී ඔවුන්ගේ බලාපොරොත්තු බරපතල ලෙස සුන්විය. නාගරාජ් මේ ගැන අදහස් දැක්වූයේ මෙසේයි. 

“අපි එහේ ගිහිල්ලා ඔරලෝසු නිෂ්පාදකයින් කිහිප දෙනෙකුටම අපේ සිහින් ඔරලෝසු යාන්ත්‍රණය පෙන්නුවා. ඔවුන් අහපු පළවෙනි ප්‍රශ්නය වුනේ “මොකක්, ඔයාලා මේක හැදුවද?“ කියලයි. අපි මේකට මිමි 3.5 ගණකම තියන ජල ප්‍රතිරෝධක කවරයක් ඕන කිව්වාම  කීපදෙනකේම ඇහුවා අපිට පිස්සුද කියලා. සමහරු අපේ ආකෘතිය එයාලගේ වැඩපොළට අරං ගිහින් ආපහු අරන් ආවා ඒක කරන්න බෑ කියලා. අපි සමහර ආයතනවල ඉහලම ප්‍රධානියා පවා මුණ ගැහුනා මේකට විසඳුමක් හොයාගන්න. එයාලා ගොඩක් පුදුම වුනා ඉන්දියානු සමාගමක් ඉස්සෙල්ලාම මේ වැඩේට අතගහපු එක ගැන. අපිට පුදුම හිතුනේ එයාලා මේක කරන්න බෑ කියලා කියපු එක ගැන. මේ වැඩේට ගොඩක් කොටස්වල සැකැස්ම හිතාගන්න බැරි විදිහට වෙනස්කරන්න වෙන නිසා එයාලා වැඩේට අතගහන්න ලෑස්ති වුනේ නෑ.“

            ස්විස් ජාතිකයන්ට ඔරලෝසු යාන්ත්‍රණය මුල සිට නිර්මාණය කල හැකි වුවද ඒ වටා ජල ප්‍රතිරෝධක ආවරණයක් නිර්මාණය කරන්නට නොහැකි විය. 
www.pmwf.com

මෙම ආවරණය අභියෝග තුනක් එකවර ජයගත යුතු විය. 
  • පළමුව මුළු ගනකම මිමි 3.5ක් වන අයුරින් ආවරණය බොහෝ තුනී විය යුතුය.
  • එය ජල ප්‍රතිරෝධක විය යුතුය
  • තෙවනුව එය මනබඳනා නිමාවකින් යුතු විය යුතුය. 
      මෙම කාර්යයන් සියල්ල තෘප්තිමත් කරන්නට නම් ඔරලෝසු ආවරණයයේ ප්‍රධාන කොටස් තුන සඳහාම විප්ලවීය වෙනසක් අවැසි විය. එනම් වීදුරු මුහුණත, පිටුපස කවරය, ක්‍රවුනය (කටු සීරුමාරු කිරීම සඳහා පැත්තෙන් ඇති යතුර) යි.
      උදාහරණයක් ලෙස වීදුරු මුහුණත සලකන්න. සමාන්‍යයයෙන් එය මිමි 1-1.2 අතර ගණකමකින් යුතු වේ. එහෙත් මුළු ඝනකම මිමි3.5 ඉලක්කය සපුරාගන්නට මෙම වීදුරු මුහුණත  උපරිම ලෙස මිමි 0.3ක් ඝණකම් විය යුතු විය. එය සමාන වනුයේ පත්තර පිටු තුනක ඝණකමටය. 
       බලාපොරොත්තු සුන්වූ ධ්වරකාන්ත් හා නාගරාජ් සියරට බලා ආපසු පැමිණ සර්සස් දේසයි වෙත සිදුවූ සියල්ල වාර්තා කර සිටියහ. දේසයි ඔහුගේ ජනප්‍රියම ප්‍රශ්නය ඔවුන් වෙත පෙරළා යොමු කලේය.
“ඇත්තද? දැන් අපි මේකට මොකද කරන්න ඕනෑ? කොහොමද ප්‍රශ්නේ විසඳන්නේ?“
“ස්විස්කාරයන්ට කරන්න බැරි නම් අපි මෙහේ මේක හදමු. එයාලට බැරිවුනාට අපිට පුළුවන්“ ඔවුහු පිළින දුන්හ. 
“හරි එහෙනම් අපි ඒක කරලා පෙන්නමු.“ දේසයි තීන්දු කලේය. 

     දේසයි මේ ගැන විශ්වාසයෙන් යුතු වුවද ආයතනයේ අන් අය මේ ගැන සැකකලහ. මෙවන් සුවිසල් අභියෝගයක ප්‍රථිඵල පෙන්වන්නට කල් ගත වූ බැවින් අන් අය තමන්ගේ අවසාන නිගමනය ප්‍රකාශ කලහ. සරදමකට මෙන් ඔවුන් හේතු දැක්වූයේ

“ස්විස් ජාතිකයින්ට කරන්න බැරි දේවල් අපි කොහොමද කරන්නේ. අන්තිමට අපිට ලෝකයා අනිත් පැත්තෙනුත් හිනාවෙයි“ යනුවෙනි. 
 සමහර අවස්ථාවන්හිදී මෙවන් සරදම් මෙවන් හේතු අප යන ගමනේ වේගය අඩාල කරවයි. අපි දක්ෂ නම් එවන් සරදම් අපේ ගමනට ශක්තියක් කරගත හැකි වනු නිසැකය. ටයිටන්හි සිදුවුනේ දෙවැන්නයි. 

බොහෝ වෙලාවට මෙම ශක්ති උරාබොන්නන් ශක්ති ජනනය කරන්නටද ඉවහල් වේ. ඒ එවා එකම කාසියක දෙපැත්තක් මෙන් එකිනෙකට බැඳීපවතින බැවිනි. ඔබට ඔබගේ අභියෝගය ඒ වෙනුවෙන් කැපවීමට අවැසි කාරණය ගැන සැක සංකා ඇති නම් ඔබ අධෛර්ය වන්නේ‍ කුමකින්දැයි සොයා බලන්න. එය තමන්ගේ දෑත් ශක්තිමත් කරන්නක් බවට පත්කරන්නේ කෙසේදැයි සිතන්න. 


නාගරාජ්ට තමන්ගේ කණ්ඩායම ධෛර්මත් කර හැකි වූවාද? ඉතිරිය ඊළඟ කොටසින්.  


Monday, June 30, 2014

වෙනසට එරෙහිව-ටයිටන් විප්ලවය 5

පළමු කොටසට
මෙතෙක් කතාව...

     මේ ඉන්දියාවේ ටයිටන් ඔරලෝසු සමාගමේ විප්ලවීය නිර්මාණයක් වූ ලොව සිහින්ම ජලප්‍රතිරෝධක ඔරලෝසුවේ කතාවයි. ස්වදේශීයත්වය අගයමින් සංවර්ධිත රටවල් කෙරෙහි වූ සෙය්‍ය මාන ආකල්පය ජයගනිමින් තම රට තුල නිපදවූ විස්මිත නිර්මාණයක කතාවයි. 
සර්සස් දේසයි 

අභියෝගය ජය ගැනීම: ඔරලෝසු චලිතය
    සුබ්‍රමන්යා භට් හා බී.ජී ධ්වරකාන්ත්ගෙන් අත්පොත් තැබූ පර්යේෂණ කණ්ඩායම ඔරලෝසු චලිතය නිර්මාණය ආරම්භ කළහ. එහෙත් ඒ වන විට ඔරලෝසු චලිතය කෙසේ විය යුතුද ලෝකයේ දැනට පවතින මිමි සහ පැරාමිතීන් මොනවාද යන්න පිළිබඳව ඔවුන්ට වැඩි අවබෝධයක් තිබුනේ නැත. ඔවුන් ඔරලෝසු චලිතය මුල සිට නිර්මාණය කරන්නට පටන් ගන්නා තනිව සැදුනු කණ්ඩායමක් විය. කිසිදු අයුරකින් ඔවුන්ට කොපි කිරීමට හෝ වෙනස් කිරීමට ආකෘතියක් ලැබී තිබුනේ නැත.
    එනිසාවෙන්ම මෙම අභියෝගය අති දැවැන්ත එකක් විය. දැනට පවතින මිමි 3.4 සිට මිමි 1.15 දක්වා ඔරෙලා්සු චලිතයේ ඝණකම අඩුකිරීමට සුසමාදර්ශිය වෙනසක් අවැසි වී තිබිණි. (Paradigm Shift) එය නිර්මාණය, සැලසුම් කිරීම, නිෂ්පාදනය, එකලස් කිරීම හා තත්ව පරීක්ෂාව යන සියලු අංශයන් නැවත සිතන්නට පොළඹවන වර්ගයේ තාක්ෂණික අභියෝගයක් ජයගත හැකි වෙනසක් විය යුුතු විය. වෙනත් ලෙසකින් කියනවා නම් මෙතෙක් නිපදවූ සියලු අංගෝපාංග විශේෂයෙන් බැටරිය හා ස්ටෙප් මෝටරය තවත් කුඩා කර දී ඇති කුඩා ඉඩ තුළට රිංගවිය හැකි ආකාරයෙන් තැනිය යුතු විය. බැටරිය ගත්කල අපි සැවොම දන්නා උභතෝකොටික ප්‍රශ්නය වන්නේ බැටරිය කුඩා වද්දී එයට ගබඩා කල හැකි ශක්තියද එයට සමානුපාතිකව අඩු වීමයි. එය දෙකින් එකක් ආකාරෙය් අභියෝගයකි. බැටරිය කුඩා කල හැකිය නැතහොත් අවශ්‍ය විද්‍යුත් ශක්තිය ගබඩා කරගත හැකි විශාල බැටරියක් යොදාගැනීමට සිදුවේ. එම කාරණා දෙකම සම්පූර්ණ කරගැනීම කල නොහැකි දෙයකි. එහෙත් ඔබද මමද එය දනිමි. නිර්මාණශීලීත්වය යනු දෙකින් එකක් නොව දෙකම කරන්නේ කෙසේද යන්න සොයාගැනීමයි. 
     ඔවුන්ගේ සුපුරුදු බැටරි නිෂ්පාදකයින් සියලු දෙනාම පැවසුයේ එය කල නොහැකි දෙයක් යනුවෙනි. තමන්ගේ සුපුරුදු හවුල්කරුවන්ගෙන් මිදී නැවත ඉතා පරීක්ෂාවෙන් සොයා බැලු විට ඔවුන්ට සෑහීමකට පත්විය හැකි ශක්තියක් ගබඩා කරගතහැති මිමි 1.05 ක ඝනකමකින් යුතු බැටරි නිෂ්පාදකයෙක් ඇමරිකාවෙන් හමුවිය. 
එහෙත් එයත් සෑහුණේ නැත. ඔරලෝසුවක ජල ප්‍රතිරෝධක තත්වය බොහෝ කාලයක් පවතින්නට නම් එහෙි පිටුපස කවරය නිතරම ගලවන්නට සිදු නොවිය යුතුය. බැටරිය මාරුකිරීම සඳහා පිටුපස කවරය ඉතා අඩුවෙන් ගලවන්නට සිදුවන තාක් කල් ජල ප්‍රතිරෝධකතත්වය සුරැකිව පවතී. එය සත්‍ය වන්නේ බැටරියේ ශක්තිය බොහෝ කාලයක් භාවිතා කිරීමට හැකි අයුරින් සුරැකිව තිබුෙණොත් හා එහි ගබඩා කිරීමේ හැකියාව වැඩි වුවහොත් පමණි. 
බැටරියේ ජීවත කාලය හා එහි ගබඩා කල හැකි ශක්තිය අවැසි ලෙස වැඩි කල නොහැකි නමි ඉතිරි වන අනෙක් විසඳුම වන්නේ මෙම ශක්තිය වැය කෙරෙන සිඝ්‍රතාවය අඩු කිරීමයි. ඒ සඳහා ඔරලෝසු චලිතයට අවැසි ශක්තිය අඩුකල යුතු ක්‍රමයක් සිතා බැලිය යුතු විය. ඔරලෝසුවක වැඩිපුරම ශක්තිය වැය වන්නේ එහි හදවත බඳුවූ ස්ටෙප් මෝටරයයි. ඔරලෝසු කටු කරකැවෙන්නේ ස්ටෙප් මෝටරය මගිනි. ඔරලෝසු බැටරියෙන් වැඩි ශක්ති ප්‍රමාණය් වැය වන්නේද ස්ටෙප් මෝටරය ක්‍රියා කරවීමටයි. මෙම මෝටරයේ ශක්ති පරිභෝජනය අඩු කරන්නේ කෙසේද? තවත් අළුත් ගැටලුවක් ඔවුන් ඉදිරියේ ඇත.
     ස්ටෙප් මෝටරය වෙනම ගත්තත් එය ඉතා සංකීර්ණ කොටස් වලින් සැදූවක් වූ අතර ඒවා කුඩා කරනවාට අමතරව එහි ශක්ති පරිභෝජනයත් අඩකින් අඩු කල හැක්කේ කෙසේද? 
     ඔවුහු බැටරියේ ආයුකාලය දිගු කිරීමට හැකි සිිලිකොන් චිපයක් නිර්මාණය කරන අතරේම ස්ටෙප් මෝටරය දැනට වැය කරනා ශක්තිය අඩකට අඩු කර හැකි ක්‍රමයක්ද සොයන්නට පටන්ගත්හ. අවසන ඔවුන් අපේක්ෂා කලේ බැටරියේ ආයු කාලය දෙගුණයක් කිරීමයි. 
      පර්යේෂණ කණ්ඩායම මගින් ගන්නා ලද තීරණයට අනුව මෙම ස්ටෙප් මෝටරය නිර්මාණය හවුලේ සිදුකිරීමටත් එහි කොටස් නිෂ්පාදනය ස්විට්සර්ලන්තයට භාරදීමටත් තීරණය කෙරිනි. ඉතා කුඩා මේ ස්ටෙප් මෝටර් කොටස් තමන්ගේ කර්මාන්තශාලාවේදී එකලස් කිරීමට අවැසි යන්ත්‍රෝපකරන ලහි ලහියේ ටයිටන් තුල නිශ්පාදනය කෙරිණි. 
මෙම කණ්ඩායමේ ආකල්පය ගැන මදක් සිතා බලන්න. ඔවුන්ට හමුවුනු තරමක් හමුවූයේ ජය ගැනීමට අපහසු අන්දමේ අභියෝගයි. එහි එක් සාමාජිකයෙකු පසුව පැවසූ අන්දමට ජය ගැනීමට අපහසු කල නොහැකි අභියෝග ගැන කණිපින්දම් කියාගෙන ඔවුන් සර්සස් දේසයි ලඟට ගිය විට ඔහු පළමුව ඔවුන් සමඟ එක්ව කඳුළු සැලුවේ මෙය කෙතරම් ලොකු අභියෝගයක්දැයි පිළිගනිමිනි. දෙවනුව ඔහු ඔවුන්ගෙන් ඇසුවේ “දැන් මේකට මොකද කරන්න හිතාගෙන ඉන්නේ?“ යන්නයි. එයට පිළිතුරු සපයනුවස් ඔවුහු විසඳුම් සොයාගත්හ. නැතහොත් විසඳුම් නිර්මාණය කළහ. 

       දැන් ලොව සිහින්ම ජලප්‍රතිරෝධක ඔරලොසුවේ චලිතය බොහෝ දුරට නිර්මාණය කර අවසන්ය.  ලොව සිහින්ම ඔරලෝසු චලිතයේ සංකල්පනාවේ සිට නිෂ්පාදනය දක්වා තිබූ දිර්ඝ ගමන් මගේ ඔවුහු බොහෝ නිර්මාණශීලී සොයාගැනීම් කලහ. විටෙක ඔවුන් ඒ සඳහා අවැසි උපකරණ, මෙවලම් හා නිශ්පාදන පහසුකම් පිළිබඳව නැවත අධ්‍යනය කරමින් අළුත් දෑ සොයාගත්හ. ඔවුන් හට පිළිපදින්නට එම කර්මාන්තයේ සම්මත මිනුම් තිබුනේ නැත. තිබුනත් ඔවුන් හා එක්වන්නට වෙනත් තරඟකරුවන් එකතු නොවනු ඇත. සියල්ලම ඉතා සුක්ෂම අයුරින් තමන්ගේ කණ්ඩායම තුලම නිර්මාණය කරගත යුතු විය. 
     අවසන මිමි 1.15 ක ගණකමින් යුතු ඔරලෝසු චලිතය නිර්මාණය කර සම්පූර්ණ වූ අතර එයට අලංකාර මුහුණතක් හා ආවරණයක් අවැසි විය. මෙම ආවරණය ජල ප්‍රතිරෝධක විය යුතු විය. 

අභියෝගය ජය ගැනීම; ඔරෙලෝසු ආවරණය 
ඔරලෝසු චලිතය නිර්මාණය වූ අවසන සර්සස් දේසයි මෙම ආවරණය පිළිබඳ අභියෝගය ජය ගැනීමට ඉංජිනේරු අංශ ප්‍රධානී බී.වී නාගරාජ්හට පැවරුවේය. මිමි 1.15ක් සිහින් තමන්ගේ වැඩකරන ආකෘතිය රැගෙන නාගරාජ් හා ධ්වරකාන්ත්... ඉතිරිය ඊළඟ කොටසින්..


පින්තූරය: http://titanworld.com/in/the-brand/titan-story/

Wednesday, June 25, 2014

වෙනසට එරෙහිව-ටයිටන් විප්ලවය 4

පළමු කොටසට
මෙතෙක් කතාව...
 

අභියෝගය ජය ගැනීම කරා

        සුදුසු ඉංජිනේරු තාක්ෂයන්හි අඩුපාඩ නිසා “Edge“(එජ්) නිර්මාණය කිරීම ලෙහෙසි වූයේ නැත. එහෙත් සැබෑ අභියෝගය වූයේ ඒ හා බැඳුනු මිනිස් සන්තානයන්හි අභ්‍යන්නතරයන්හි කා වැදී තිබූ හීන මානයයි. එවකට ඉංජිනේරු අංශයේ ප්‍රධානියාව සිටි බී.වී. නාගරාජ් මහතාගේ වචන වලින් කිවහොත් දුෂ්කරම කාර්යය වූයේ කණ්ඩායමේ, සමාගමේ වැඩ කල මිනිසුන්ගේ සිත්වලට මෙය කල හැකි දෙයක් යන ආත්ම විශ්වාසයන කා වැද්දවීමයි. නාගරාජ් මහතා එය මෙසේ විස්තර කරයි. 
1. පළමුව ආයතනයේ බොහෝ ස්ථරවල මේ ගැන බොහෝ සැකසංකා මතුවී තිබිණි.
2. දෙවනුව දුෂ්කර වූයේ මේ සඳහා වැදගත්වන ප්‍රධාන පුද්ගලයින් එකට එක්කර ගැනීමයි.
3. තෙවැන්න මේ දුෂ්කර කාර්යයේ ඇති තාක්ෂණික අභියෝගයයි. නිර්මාණය වැඩිදියුණු කිරීම, නිෂ්පාදනය හා මේ වෙනුවෙන් අවැසි වූ මෙවලම් (tools) තැනීම වෙනනම කතා කල යුතු අභියෝගයන් විය. විශේෂයෙන් ඔරලෝසු චලිතය හා ඔරලෝසු කවරය (case) සඳහා කණ්ඩායම වෙන වෙනම වෙහෙසිය යුතු විය. 
http://titanworld.com/in/titan-care/warranty/

නාගරාජ් මහතාට අනුව පළමු හා දෙවන අභියෝගය ජය නොගත්තේ නම් තෙවැන්න එනම් තාක්ෂණික අභියෝගය ජයගැනීම ගැන සිතිීමටවත් නොහැකි වනු ඇත. කුමන හෝ විප්ලවීය නිර්මාණයක් සඳහා ඇති විශාලම අභියෝගය වනුයේ කණ්ඩායම තුල ඒ සඳහා ආත්ම විශ්වාසය ජනනය කිරීමයි. මෙවන් විශාල කඩඉම නිවේදනය කල විට ටයිටන් ආයතනයේ බොහෝ දෙනා මතුකල ප්‍රශ්නය වූයේ “ස්විස්කාරයොන්ටත් බැරි දේවල් අපි කරන්නේ කොහොමද?“ යන්නයි. ඔවුන් තරඟය පටන් ගන්නටත් පෙර තරඟයේ අවසානය තීරණය කර තිබුණේ ස්විස් ජාතිකයන් හට බැරි දෙයක් කිිසි ලෙසක කරන්නට බැරිබව කියාපාමිනි. 

මෙය ඔබ අසන හාස්‍යජනකම අතාර්කිකම නිගමනය වන්නට ඉඩ තිබේ. “වෙන කිසිවෙකුත් එය මීට පෙර කර නොමැති නම් එය කිසි කලෙක කිසිදු තත්වයක් යටතේ වෙන කිසිවෙකුත් අනාගතයේ නොකරනු ඇත. කවුරුන් හෝ යම් දෙයක් කර තිබේ නම් ඒ අප නොව වෙන තැනක වෙනත් කණ්ඩායමකි. “
සංවර්ධිත රටවල් හා අප අතර ඇති මේ සිතීමේ වෙනස අපට බලපා ඇති අයුරු ඛේදජනකය. ටයිටන්හි ප්‍රධානීන්; තාක්ෂණික කළමනාකරු ධ්වාරකාන්ත්, පර්යේෂණ කළමණාකරු නාගරාජ් හා සර්සස්  දේසයි හට විසඳන්නට සිදුවූ මුල්ම හා පසුව තේරුම්ගත් පරිදි විශාලතම ගැටළුව වූයේ ආත්ම විශ්වාසයෙන් යුතු කණ්ඩායමක් ගොඩ නැගීමයි.
ඔරලෝසු නිෂ්පාදනය කරන්නේ ප්‍රධාන ලෙස අංශයන් තුනක ගැලපීමෙනි. පළමුව ඔරලෝසු චලිතය නිෂ්පාදනය කිරීම,දෙවනුව ඒ සඳහා සුදුසු අලංකාර ආවරණයක් නිපදවීම හා ඒවා එකලස් කිරීමයි. මේ සියළු අංශයන් හට වැඩියෙන් අළුත් මුහුණු එකතු කල යුතු වූ අතර ඊට අමතරව පර්යේෂණ කණ්ඩායමත් ශක්තිමත් කල යුතු විය. නව මුහුණු බඳවාගැනීමෙන් පමණක් මෙම අභියෝගය දිනිය නොහැක. ඔවුන් අළුත් දෙයක් අත්හදා බැලිය හැකි තරඟයේ නිමාව තෙක් එක හැල්මේ දිවිය හැකි ආත්ම විශ්වාසයෙන් යුතු වූ තමන්ගේ වගකීම තම මේසයෙන් පුටුවෙන් ඔබ්බටද පවතින බව අවබෝධ කරගත් කණ්ඩායමක් වියු යුතු විය.

ඔබ ඔබේ කණ්ඩාම සාර්ථක ලෙස ස්ථාන ගතකොට ඔවුන් හට තමන්ගේ වගකීම හා දායකත්වය හොඳින් අවබෝධ කරගන්නට සැසලුවේ නම්  නම් ඔබට කිසිවිටෙක ඔවුන් පසු පස සිට මෙහෙය වන්නට සිදු නොවනු ඇත. ඔවුන් තමන්ගේ පාඩුවේ සාර්ථක ලෙස නිවැරදි ලෙස තම කාර්යය ඉටු කරනු ඇත. ඔබගේ කාර්යාලයේ ඉන්නා සගයන් හා යටත් සේවකයින් ලෙස හොඳින් බලන්න. ඔබට නිතරම ඔවුන් කරන්නේ කුමක්දැයි විමසිය යුතු නම් ඇන ඇන මගපෙන්විය යුතු නම් එයින් බොහෝවිට කියැවෙන්නේ ඔබ කණ්ඩායම සාර්ථක ලෙස තම අරමුණ වෙනුවෙන් ස්ථාන ගත කොට නොමැති බවයි. ඔවුන්ගේ දායකත්වය නිසි ලෙස ස්ථාපනය කොට නොමැති බවයි.
 එම කණ්ඩායමේ සාමාජිකයකු පසුව උදාහරණයක් ගෙනහැර පෑවේ මේ යථාර්තය පෙන්වන්නය.
සාමාන්‍යයෙන් අළුත් දෙයක් වෙනුවෙන් නිෂ්පාදන කණ්ඩායමේ ප්‍රතිචාර වන්නේ  “ මේ බලනවා. තමුසේ සැලැස්ම දෙනවා. මම ඒකට නූලට හදන්නම්. ඒක වැඩකරොත් හොඳයි නැත්තම් මට ඒක අදාල නෑ“ යන්නයි.
තමන්ගේ කාර්යෙයහි වැදගත්කම හා ඒ වෙනුවෙන් කැපවීම වැදගත්බව දන්නා මූලික පෙළගැස්ම සාර්ථක කාණ්ඩායමක ප්‍රතිචාරය ඒසේ නොවනු ඇත. තම වගකීම අවබෝධ කරගත් පෙරකී කණ්ඩායමක් නම් ඔවුන් පවසනු ඇත්තේ මෙසේය.
“තමුසේ සැලැස්ම හදලා ඒක අපිට දීලා අමතක කරලා දානවා. අපි බලාගන්නම් ඉතුරු ටික. අපි කොහොම හරි ඒක වැඩකරන විදිහට හදන්නම්.“

අභියෝගය ජය ගැනීම: ඔරලෝසු චලිතය

    සුබ්‍රමන්යා භට් හා බී.ජී ධ්වරකාන්ත්ගෙන් අත්පොත් තැබූ පර්යේෂණ කණ්ඩායම ඔරලෝසු චලිතය නිර්මාණය වෙනුවෙන්...ඉතිරිය ඊළඟ කොටසින්.

Monday, June 23, 2014

වෙනසට එරෙහිව-ටයිටන් විප්ලවය 3

පළමු කොටසට
මෙතෙක් කතාව...

ගෝලීය තරඟකාරී වෙළඳපොලක් කරා: උප්පත්ති කතාව
     
      මෙම විප්ලවයේ මූලාරම්භය සනිටුහන් වනුයේ 1985දී ටයිටන් ඔරලෝසු සමාගම ටාටා සමූහය හා තමිල්නාඩු කාර්මික සංවර්ධන සමාගම සමඟ බද්ධ ව්‍යාපාරයක් පටන් ගැනීමත් සමඟිනි. ප්‍රංශ සහයෝගීතාවය මත ඔරෝසුවේ කටු කැරකෙන තාක්ෂණය පිළිබඳ දැනුමෙන් සන්නද්ධ වූ ඔවුහු 1987 මාර්තු මාසයේදී මුල් වරට වෙළඳපල සඳහා ඔරලෝසු නිශ්පාදනය ඇරඹූහ. ඉතා සුළු කාලයකින් ප්‍රංශ සහයෝගීතාවයෙන් ලැබූ තාක්ෂණය අභිබවා ගිය ඔවුහු තමන්ගේම නිර්මාණ තාක්ෂණයක් දියුණු කිරීමට වෙහෙසෙන්නට විය. මේ වන විට ප්‍රංශ සහයෝගීතාවයේ වලංගුකාලය අවසන් වී තිබුනු අතර සර්සස් දේසයි හට සියල්ල මුල සිට පටන් ගැන්මට සිදුවී තිබිනි. ඔරලෝසු චලිතය නිර්මාණය,සංවර්ධනය හා නිශ්පාදනය මුල සිට පටන් ගන්නට ඔවුන් තීරණය කලෝය.  ඔවුන් තුල තිබූ ලොකුම අභිප්‍රාය වූය ගෝලීය වෙළඳපලතුල තරඟකරුවකු වීමයි. ලෝකයේ විෂේශඥයන්ගෙන් ගෞරවය බලාපොරොත්තු විය හැක්කේ හොඳම තාක්ෂණය සොයාගැනීමෙන් මිසක කාගේවත් තාක්ෂණයක් විකිණීමෙන් නොවන බව ටයිටන් කණ්ඩායම දැන සිටියේය. 
     බී.ජී.ධ්වරකනාත් මූලීකත්වය දැරූ පර්යේෂණ කණ්ඩාම අළුත් ඔරලෝසු චලිත තාක්ෂණයක් දියුණු කල අතර 1994දී සර්සස් දේසයි මෙම කණ්ඩාමයට අළුත් දූස්රාවක් එවුවේය. ඒ ලෝකයේ සිහින්ම ඔරලෝසු චලිතය නිර්මාණය කිරීමේ අභියෝගයයි. එම අභියෝගය එවකට වෙළඳපල තිබුනු ප්‍රවණතා සමඟ ගැලපුනද එය ජය ගැනීම අතිශය දුෂ්කර එකක් විය. සිහින්ම යන්නෙන් කියැවෙන්නේ කුමක්ද? මුලින්ම එය පහදා ගත යුතු විය. ඔවුහු තම කණ්ඩායම ඇතුලෙන්ම මිණුම් ලකුණ නිර්මාණය කැරගත්හ. ඔවුහු තමන් විසින්ම පනවා ගත් අභියෝගය වූයේ මිලි මීටර් 1.15ක් සිහින්-ඔව්,ණයපතක් තරම් සිිහින්- ඔරලෝසු චලිතයක් නිර්මාණය කිරීමයි. මෙය ලෝකයේ සිහින්ම,ගණකම අඩුම ඔරලෝසු චලිතය නොවුනත් එය ඔවුන්ගේ සිහිනය කරා යාමට මග සලසනු ඇත. එහෙත් අති විශාල භාරදූර අභියෝගයකි. තමන් දැන් නිශ්පාදනය කරන මිලිමීටර 3.4ක ඝනකම එයින් භාගයකයටත් වඩා අඩුවෙන් නිර්මාණය කිරීම ලේසි පහසු නොවේ. එය කොයි අතින් ගත්තත් සුවිශේෂ අභියෝගයකි. විශේෂයෙන්ම තමන්ගේ දෙවන ඔරලෝසු චලිතය අත්හදා බලන කණ්ඩායමක් සඳහා මෙය අති දැවැන්ත අභියෝගයක් විය.
    
http://titanworld.com/in/watches/collections/edge/
ඔවුන් ඒ වෙනුවෙන් වැඩ ආරම්භ කරද්දී, දේසයි කඩුල්ල තවත් ඉහලට එසවීය. ඒ මෙම ඔරලෝසු චලිතය කවරයකට බහා එය මනරම් ඔරලෝසුවක් කිරීමයි. එපමණකින් නොනැවතී ඔහු මෙම ඔරලෝසුව ජල ප්‍රතිරෝධක විය යුතු බව නිවේදනය කලේය. ඉන්දියානුවන් ජල ප්‍රතිරෝධ ඔරලෝසු භාවිත කිරීමේ හැකියාව අවම වීම නිසා මෙම අභියෝගය මුළුමනින්ම කල නොහැක්කක් බවට පත් විය. එවකට පැවති කිසිදු ජල ප්‍රතිරෝධක ඔරලෝසුවක් සිහින් ඒවා නොවීය. ඒවා දිනපතා රළු පාවිච්චිය සඳහා නිපැයූවක් නොවීය. එනිසා මෙම කණ්ඩායම කෙතෙක් වෙහෙස දරා සිහින්ම ජල ප්‍රතිරෝධක ඔරලෝසුව නිර්මාණය කලද එය කෞතුකාගාර වල හා ප්‍රදර්ශනාගාරව වල ලස්සනට තැබෙන වටිනා ප්‍රදර්ශන භාණ්ඩයක් වීමේ හැකියාව ඉතා ඉහල විය. එහෙත් ඒ හේතු කිසිවක් අභියෝගය වෙනස් කිරීමට සමත් නොවින්. දිනපතා පාවිච්චියට සුදුසු ඉතා සිහින් ජල ප්‍රතිරෝධක ඔරලෝසුවක් නිර්මාණය කිරීම ඔවුන්ට පැවරී තිබුණු කාර්යයි. 


අභියෝගය ජය ගැනීම කරා

සුදුසු ඉංජිනේරු තාක්ෂයන්හි අඩුපාඩඅ නිසා “Edge“(එජ්) නිර්මාණය කිරීම ලෙහෙසි වූයේ නැත. එහෙත් සැබෑ අභියෝගය පැවතුනේ....ඉතිරිය ඊළඟ කොටසින්...

Friday, June 20, 2014

වෙනසට එරෙහිව-ටයිටන් විප්ලවය 2

පළමු කොටසට..

විප්ලවයේ මුල් බිජුවට

       1994දී ටයිටන් ඔරලෝසු සමාගමේ එවකට සිටි කළමණාකරන අධ්‍යක්ෂ සර්සස් දේසයි තමන්ගේ අළුත්ම අභියෝගය සඳහා කණ්ඩායම පෙළගස්වද්දී පළමුව මුහුණ දීමට සිදුවූයේ පෙරකියන ලද හීන මානය උත්සන්න වූ ජාතියකින් නැගෙන කණිපින්දම්වලටය. ඔහුගේ අළුත්ම අභියෝගය වූයේ “ලොව සිහින්ම ජල ප්‍රතිරෝධක ඔරලෝසුව“ තැනීමයි. මෙයින් කියැවෙන්නේ ඔරලෝසුවේ ඝණකම උපරිම වශයෙන් මිමි 3.5ක්වත්- ෆ්ලොපි ඩිස්කයක ඝණකම- විය යුතු වූ අතර වතුර යටදී ක්‍රියාකරවිය හැකි විය යුුතුය. ඔවුහු ඔරලෝසු තැනීමේ ශූරයන් ලෙස සැලකෙන ස්විස් ජාතිකයන්ගෙන් මේ පිළිබඳව අදහස් විමසූ විට ඔවුන් කියා සිටියේ එය අසම්භාව්‍ය, කල-නොහැකි නිෂ්පාදනයක් බවයි. සරලව කියතොත් පෙරකී ඝණකමෙන් යුත් ජල ප්‍රතිරෝධක ඔරලෝසුවක් කිසි දිනෙක නිෂ්පාදනය කල නොහැකි බවයි. එක්කෝ ඔරලෝසුවක් සිහින් විය යුතු අතර නැත්නම් ජල-ප්‍රතිරෝධක විය යුතු බව ඔවුහු කියා සිටියහ. එවන් විශේෂාංග දෙකම එක ඔරලෝසුවක පැවතිය නොහැකි බව ඔවුහු තව දුරටත් ඒත්තු ගන්වන්නට විය. 

      කෙසේවුවද ටයිටන් කණ්ඩාමය අභියෝගය භාරගත්හ. ස්විස් ජාතිකයන්ට නොහැකි නම් අපිට පුළුවන් අපි කර පෙන්නවන්නම් යැයි ඔවුහු කීහ. අගය කල යුතු කාරණය වන්නේ ඔවුන් එය කර පෙන්වීමයි. අවුරුදු 4ක් ගතවූ තැන ඉංජිනේරු විද්‍යාවේ දුෂ්කරතා විප්ලවීය ලෙස ජය ගනිමින් ඔරලෝසු තැනීමේ පාරාමිතීන් සියල්ල නැවත ලියමින් ඔවුහු අභියෝගය ජය ගත්හ. 
http://titanworld.com/in/watches/products/?id=1250

       ලෝකයේ සිහින්ම ජල-ප්‍රතිරෝධක ඔරලෝසුවේ සංකල්පය, නිර්මාණය වැඩි දියුණුව හා නිපදවීම සිදුවූයේ ස්විට්සර්ලන්තයේ හෝ ජපානයේ නොවේ. එවකට අවුරුදු 10ක් වයසැති ඉන්දියානු කර්මාන්ත ශාලාවකය. 1998දී නිෂ්පාදනය සඳහා සුදුසුකම් ලබා 2000 වසරේදී වෙළඳපලට නිකුත් කෙරුනු මෙම අපූරු ඔරලෝසුව “Edge“ ලෙස නම්වූයේය. ඉතා නිහඬ ලෙස, නිරහංකාර ලෙස ඉන්දියානු සමාගමක් ඉංජිනේරු විප්ලයක් සිදුකර ඉතිහාසයේ සිය නම රන් අකුරින් ලියුවේය.

        
      අද “Edge“ ටයිටන්හි සාර්ථකත්වයට මග පෙන්වූ අතර සිහින්ම ජල-ප්‍රතිරෝධක ඔරලෝසුව ලෙස ලොව පුරා විකිණෙයි. මෙම සන්නාමය ටයිටන් සමාගෙමේ කෝටි 918ක් වූ පිරිවැටෙුමෙන් 6%ක් තරම් (කෝටි 55ක්) පමණකට දායක වන අතර අදවන විට ඔරලෝසු ලක්ෂ 5කට වැඩියෙන් විකිණි ඇත. මුල්‍යමය බලපෑමට වඩා “Edge“හි සත්‍ය බලපෑම දැනුනේ ටයිටන්හි ඇටමිදුළු වලටය. “Edge“ ටයිටන් හට “නිර්මාණශිලීව යමක් ලොවට දීමට හැකි“ විශ්වාසය ලබාදුන්නේය. 

ගෝලීය තරඟකාරී වෙළඳපොලක් කරා: උප්පත්ති කතාව
     
      මෙම විප්ලවයේ මූලාරම්භය සනිටුහන් වනුයේ 1985දී ටයිටන් ඔරලෝසු සමාගම බද්ධ ව්‍යාපාරයක්...ඉතිරිය ඊළඟ කොටසින්...

Wednesday, June 18, 2014

වෙනසට එරෙහිව - ටයිටන් විප්ලවය 1


පූර්විකාව

       සියවැනි පෝස්ටුව කෙසේ විය යුතු දැයි ඡායා මාත්‍රයක් මසිතේ ඇති වූයේ බොහෝ කලකට පෙරය. ජීවිතේ හමුවුනු අපූරු දේ ගැන ලියද්දී සියවැනි පෝස්ටුව අපූර්වතම එකක් විය යුතු යැයි සිතෙහි තිබූ බලාපොරාත්තුව නිසා සිදුවූ එකම දෙය අළුත් පෝස්ටුව දිනෙන් දින කල් යෑමයි. දිගු කාලීන නිහැඬියාවකට පසු පෙර ලෙසම බස හසුරුවන්නට හැකි වේ දැයි සැකයක් ඇතත් උත්සාහය වැඩියෙන් වටී යැයි හැඟුනු නිසාවෙන් මේ තිළිණය ඔබ වෙත පිළගන්වන්නට අවසර...
පෝස්ටු සියයක් ඔස්සේ විවිධ මත අදහස් දරමින් ළඟින් සිටි ඔබට ස්තුතියි කියන්නට මෙයට වඩා හොඳ අවස්ථාවක් කොහිද?..

      වසර ගණනකට එපිට අප අසල්වැසි දේශයේ සිදුවූ කුඩා සිදුවීමක සෙවනැල්ලක් හා එයින් උගත හැකි පාඩම් ගැන මේ ලිපි පෙලෙහි කියැවේ. විජාතීන් කෙරෙහි අප තුල ඇති විවිධාකාර ආකල්ප මදකට පසෙකින් තබා එක් පුද්ගලයකු තමාට ඇතිවූ ගැටළුවකට පිළිතුරු සොයාගත් අයුරු ධෛර්යෙන් අභියෝග ජයගත් අයුරු ගැන කියවන්න හැකි නම් ඔබද වෙනසක් අත්දකිනු ඇත..

picture from: watchalive.wordpress.com


       දකුණු අප්‍රිකාවේදී හා ඉන්දියාවේදි මහත්මා ගාන්ධි සටන් කලේ බ්‍රිතාන්‍යන් එළවා දමන්නට නොවේ. ඔහුගේ සටන වූයේ ,“ යටත් විජිත මානසිකත්වයෙන් මිදී උසස් යැයි සම්මත ජාතීන් ඉදිරියේ සමානව සිතන්නට ඉන්දියානුවන් පොළඹවන්නේ කෙසේද?“ යන්නයි. 100,000 පමණ වූ බ්‍රිතාන්‍යයන් මිලියන 350ක් පමණ වූ ඉන්දියානුවන් පාලනය කරද්දී මෙම සටන පහසු යැයි බලාපොරොත්තුවීම යුක්ති සහගත නොවේ. උසස් තාක්ෂණය, උසස් අවි ආයුධ, යන්ත්‍රෝපකරණ, නිෂ්පාදන පමණක් නොව නීති රෙගුලාසි, ප්‍රතිපත්ති, පලන තන්ත්‍රය බදු ව්‍යුහය යනාදී එකී නොකී මේ හැම දෙයක්ම බ්‍රිතාන්‍යන් නිර්මාණය කර තිබුනේ මේ ගැති වාදී මානසිකත්වය වැඩෙන අයුරිනි.  මෙවන් ජාතියක් තුල සදිස මානය (තමා අන් අය හා සමාන යැයි සිතීම) වපුරන්නේ කෙසේද? 

       ගාන්ධිගේ ලොකුම අපේක්ෂාව වූයේ බ්‍රිතාන්‍ය ජාතිකයින්ගෙන් රට ගලවා ගැනීම නොවේ. එය කල “හැකි“ කාරණාවකි. එහෙත් වසර ගණනක් තිස්සේ ගැතිව සිටි ජාතියක මිනිසුන්ට තමන් අන් අය හා සමාන යන හැගීම නොදී තමන් කිසිදු වෙනත් ජාතියක වැඩි සැලකිල්ලක් දැක්විය යුතු නොවේ යන්න සිත්වල රෝපණය නොකර බ්‍රිතාන්‍යන් එළවා දැමුවොත් සිදුවන්නේ කුමක්ද? එය ඉඟුරු දී මිරිස් ගත්තාට සමාන වනු නිසැකය. එක් පාලක පන්තියක් තවත් පාලක පන්තියකින් පුටු මාරුවෙද්දී ජනයාගේ සිත්වල සහජයෙන් රැඳී තිබූ තමන් පහත් යැයි සැලෙකෙන මානසිකත්වය, පරම්පරාගත සූරාකෑම්, පුහු මාන්නය එලෙසින්ම පවතිනු නිසැකය. ලොකුම අභියෝගය වනුයේ මේ වෙනසට එරෙහි වීමයි.

     එක් අතකට ගාන්ධිගේ මේ විප්ලවය අදටත් වලංගුවේ. ඉන්දියොවෙන් බිහිවුනු බොහෝ විප්ලවීය නිෂ්පාදන වල මූලාරම්භය වූයේ සංවර්ධිත රටවල් කෙරෙහි දක්වන ලද සෙය්‍ය මානයයි. “වෙනසට එරෙහිව“ අභියෝගය විප්ලවීය ලෙස ජයගත් තවත් කතන්දරයකි මේ.

 

විප්ලවයක මුල් බිජුවට

 

       1944දී ටයිටන් ඔරලෝසු සමාගම පිහිටවීමමේදී එවකට සිටි කළමණාකරන අධ්‍යක්ෂ සර්සස් දේසයිට මුහුණ දීමට සිදුවූයේ පෙරකියන ලද හීන මානය උත්සන්න වූ....ඉතිරිය ඊළඟ කොටසින්..

Friday, June 13, 2014

ආයෙමත්..


සියක් දේ සිතේ තිබුනද
සියක් වැඩ රාජකාරි තිබුනද
සියක් වියමන් කියවූවද
සියක් වතාවක් සිතා සිටියද
තවම ලියන්නට බැරිවුනු මගේ 
සියවැනි පෝස්ටුව...
(මෙසේ ලියැවුනු වග..)

ගොඩක් කාලෙකට පස්සේ බ්ලොග් එකට ගොඩ වැදුනේ 100වෙනි පෝස්ටුව එක්ක. හැමදාම වගේ විෂේශ වෙලාවකදි ඔයාලට තෑග්ගක් ලැබෙන නිසා මේ සැරේ තෑග්ග ඔයාලට තීරණය කරන්න දෙන්න හිතුවා. පැත්තක තියන විජට්ටුවෙන් කැමති තෑග්ග තීරණය කරලා ජන්දය දෙන්න. තව දවස් දෙක තුනකින් ඔයාලගේ වැඩිම කැමැත්ත තීරණය වුනු තෑග්ග ඔයාල හැමෝටම ලැබේවි. :)

1. දැඩි ගතක මුදු සිත

කාලෙක කලින් පරිවර්තනය කරපු “රොබීට“ ලොකු ඉල්ලුමක් තිබුනු නිසා අයිසැක් ඇසිමෝව්ගේ ප්‍රසිද්ධ කෙටි කතාවක් වුනු “Bicentennial Man“ පරිවර්තනය.

2. වෙනසට එරෙහිවීම

පනස්වෙනි පෝස්ටුව වෙනුවෙන් තෑගි දුන්න “සිහිනය සෑබෑ කරගත් කුකුල් කේන්තිකාරයා“ හි මුල් පොතෙහි තිබූ තවත් ඉන්දියානුවෙක් ගැන අපූරු වියමනක්.

3. හද වෙණ සර

කාලෙකට කලින් ජනප්‍රිය වුනු ප්යෝ මින් සූ ගේ Heartstrings කොරියානු කතා මාලාවේ සිංහල වියමන.