පෙරළිය ඇරඹෙන්නේ මිමිනීමකිනි..Change begins with a whisper

             රූ පුංචි කාලෙ බලා ගත්තෙ ඒ දවස්වල ගෙදර නැවතිලා හිටිය අක්කලා. ඒ රූගෙ අම්මා සතියෙ දවස් පහේම වැඩ කරලා ගෙදර එන්නෙ පරක්කු වෙලා නිසා. පුංචි කාලෙ ඉදන්ම අපි දවල් දවසම ගෙව්වෙ එයාලත් එක්ක. එයාලා මාවයි මල්ලිලයි බලාගන්න නැවතිලා හිටියෙ පඩියට කියලා පස්සෙ තේරුම් ගියත් එයාලට අක්කා කියලා කතා කරන්න තමන්ගෙම පවුලෙ කෙනෙකුට වගේ සලකන්න රූ පවුලෙ කවුරුත් පසුබට වුනේ නෑ.
රන් මැණිකා අක්කා, අසෝකා අක්කා, දෙමළ ආච්චි වගේ කටට හුරු නම් වලින් අපි එයාලට කතා කලා වගේම කන බොන දේවල් නිදාගන්න දේවල්වලින් කිසිම අඩුපාඩුවක් කලේ නෑ.මට දැනුනු විදිහට මේ වගේ ‍ගෙදර වැඩ කරන අයට සලකන එක ලාංකීය අපේ පුරුද්දක්. රූ ගෙ යාළු අක්කාකෙනෙක් ගේ ගෙදර වැඩ කරන සර්වන්ට්ගේ කාමරේ ඉස්සර රූගෙ බෝඩිම් කාමරේටත් වැඩිය සුඛෝපභෝගී කියලයි එහෙ ගිය වෙලාවෙ රූට හිතුනෙ.

මේ කතන්දර ගොඩක් හිතට ආවෙ ළඟදි බලපු චිත්තරපටියක් නිසා. ලංකාවෙ සිනමා ශාලාවලට වැරදිලාවත් එයි කියල හිතන්න බැරි සිනමා නිර්මාණයක් වුනාට ඒකෙන් කියවෙන කතාව හරිම තාත්විකයි.

ඇමරිකාවෙ මිසිසිපි ප්‍රාන්තයේ 1960 කාලයේදී කළු ජාතික නිවෙස් මෙහෙකාරියන් වටා ගෙතුන මේ කතාව (The Help) ගැන හිතට දැනුනු දේවල් ගැන කියන්නයි මේ පෝස්ටුව.

සුදු කළු භේදය තදින්ම පැවතුනු මේ කාලෙ මුළු ජීවිත කාලෙම සුදු ළමයින් බලා ගත්තත් එයාගෙ එකම පුතා බේරගන්න බැරිවුනු ඇබීගේ හා කට හොඳ නැති ඒත් රසට කෑම හදන්න පුළුවන් මිනීගේත් ජීවිත කතාව අපූරුවට ඒ සිනමා පටියෙ සිත්තම් වෙලා තිබුනෙ ඒ හා සමකාලීන සුදු කාන්තාවන්ගෙ පිරිමින්ගෙ ආකල්පත් එක්ක එකට මුසුවෙලා. හොඳ නරක දෙක සුදු කළු කියලා හමේ පාටින් වෙන්කරන්න බැරි බව තේරුම් ගත්ත ඉයුජිනියා ස්කීටර් ඇබීගෙත් මිනීගෙත් තවත් මෙහෙකාරියො කීප දෙනෙක්ගෙත් කතාව පොතක පිටු අතරට ගේන්න දරණ සංවේදී උත්සාහය තමා මේ කතාවෙ අාත්මය  වෙලා තියෙන්නෙ.
සිනමා සිත්තමෙන් උපුටා ගත්ත දෙබස් ටිකක් කියන්න හිතුවෙ පුළුවන් වෙලාවක මේ චිත්තරපටිය බලන්න ඔයාලත් පොළඹෙවන්න.

“විවාහය ගැන පිරිමි ළමුන් ගැන වැඩි උනන්දුවක් නැති ඉයුජිනියාට ඇයගේ මව චාලට් මෙහෙම කියනවා.,

ආදරයයි වෛරයයි එකම එළුවගෙ අං දෙක වගේ..ඒත් ඉයුජිනියා ඔයාට ඕනෙ හොඳ එළුවෙක්.“

“Minny Jackson: Eat my shit. 

Hilly Holbrook: Excuse me! 

Minny Jackson: I said eat... my... shit. 

Hilly Holbrook: Have you lost your mind? 

Minny Jackson: No, ma'am but you is about to. 'Cause you just did“

“මිනී: ඔයා දන්නවද ඇබී මම දවසක මිස් හිලීව මරලා දානවා..දන්නවද අළුත්ම සෙල්ලම

ඇබී: ඒපාර මොකද්ද?

මිනී: මිස් හිලී ටොයිලට් පේපර්වල පැන්සල් මාක් දානවා මම එයාලගෙ ටොයිලට් එක පාවිච්චි කරයි කියලා

ඇබී: මොකක්?

මිනී: ඒත් එයා දන්නෙ නෑ මම ගෙදරින් ටොයිලට් පේපර් රෝලක්ම ගෙනල්ලා පාවිච්චි කරන විත්තිය..

ඇබී: හිකස්“

http://technorati.com/entertainment/film/article/movie-review-the-help/

ඇබී: එදා රෑ සුදු මිනිස්සු 10 දෙනෙකුයි කළු මිනිස්සු 8 දෙනෙකුයි මැරුනා. ඒ සුළි  සුළඟ එවද්දි දෙවියන්ගෙ හිතේ සුදු කළු භේදයක් තිබ්බා කියලා මම හිතන්නෙ නෑ.

කැතරින් ස්කොට් විසින් රචිත The Help නවකතාව පාදක කරගෙන ටේට් ටේලර් විසින් අධ්‍යක්ෂණය කරන ලද The Help සිනමා පටය ඔබගේ බැලිය යුතු ගොන්නට එකතු කරගත යුතුම එකක්. 


ආශ්‍රිත: http://www.imdb.com/title/tt1454029/quotes
http://en.wikipedia.org/wiki/The_Help_(film)

ප/ලි: ෆිල්ම් එක ගැන කියා ගෙනත් දී කොම්පීටරේට කොපි කර බලන්න හොඳ එකක් යැයි කිහිප වරක් මතක් කල රූ මල්ලිට ගොඩක් පින්..ඔන්න ඔයා ගැනත් ලිව්වා හොඳද?